काठमाडौँ । गृहमन्त्री र सचिवको नाम लिएर भिजिट भिसामा विदेश पठाउन दबाब दिएको आरोपमा गृह मन्त्रालयका कर्मचारी पक्राउ परेका छन् । गृह मन्त्रालयमा कार्यरत कम्प्युटर अपरेटर निर्मल विष्टलाई प्रहरीले पक्राउ गरेको गृह मन्त्रालयका सूचना अधिकारी एकदेव अधिकारीले बताए ।
उनलाई मानव बेचबिखन अनुसन्धान ब्युरोको हिरासतमा राखिएको छ । विष्टले ‘गृहमन्त्री र गृहसचिवसँग कुरा भैसकेको छ’ भन्दै असार २१ मा थाइल्यान्ड जान लागेका २० जनालाई नरोक्न अध्यागमन अधिकृतलाई फोन गरेका थिए । विष्टले अध्यागमन अधिकृत सुरेश पन्थीलाई टेलिफोन गरेर अनुचित दबाब दिएको आरोप छ ।
भिजिट भिसामा हिँडेका २० जना थाइल्यान्ड हुँदै तेस्रो मुलुक जान लागेको गृहमन्त्री रवि लामिछानेको सचिवालयले जिकिर गरेको छ । विष्ट २०७५ देखि कम्प्युटर अपरेटरको रूपमा गृहमा कार्यरत थिए ।