गिरीबन्धु टी-स्टेट प्रकरणले नेपाली कांग्रेस र नेकपा (एमाले) आमनेसामने भएका छन्।
सोमबार बिहान बालुवाटारमा प्रधानमन्त्री पुष्पकमल दाहाल ‘प्रचण्ड’ सहित माओवादी, एमाले, रास्वपा र कांग्रेसका शीर्ष नेताहरू भएको छलफलमा एमालेले गिरीबन्धुमा अध्यक्ष केपी शर्मा ओलीमाथि कांग्रेस नेताहरूले दिएको अभिव्यक्तिमाथि असन्तुष्टि जनाएको थियो।
छलफल सकिएपछि बालुवाटारमा पत्रकारहरूसँग कुराकानी गर्दै एमाले उपाध्यक्ष विष्णु पौडेलले कांग्रेस नेताहरूले अध्यक्ष ओलीमाथि प्रतिशोधपूर्ण तरिकाले दिएको अभिव्यक्ति लिखित रूपमा माफीसहित फिर्ता लिनुपर्ने अन्यथा सम्बन्ध राम्रो नहुने चेतावनी दिएका थिए।
उनले पछिल्ला दिनमा कांग्रेसले अध्यक्ष केपी शर्मा ओलीविरूद्ध पूर्वाग्रही, प्रायोजित, तथ्यहीन, भ्रामक र प्रतिशोधपूर्ण लाञ्छना लगाएको बताएका थिए।कांग्रेसका नेताहरूले पछिल्लो समय गिरीबन्धु टी-इस्टेटबारे अभिव्यक्ति दिँदै आएका छन्।
‘कांग्रेस कुनै सहमतिको पक्षमा, समस्या समाधानको पक्षमा छैन भन्ने कुरा पछिल्ला दिनका घटनाक्रम र पछिल्ला दिनका उसका अभिव्यक्तिले संकेत गरिरहेको छ,’ पौडेलले भने, ‘एउटा असान्दर्भिक, अनुचित, आधारहीन, पूर्वाग्रहपूर्ण आरोपहरु लगाउँदै राष्ट्रिय राजनीतिक परिस्थितिलाई बिथोल्ने काममा कांग्रेस लागेको छ।’
पौडेलले गिरीबन्धु टी-इस्टेटको नाम भने लिएका थिएनन्।
‘पछिल्ला दिनमा एमाले र पार्टी अध्यक्षविरूद्ध प्रायोजित, पूर्वाग्रही, तथ्यहिन, गलत, भ्रामक, प्रतिशोधपूर्ण, आधारहिन लाञ्छनाहरुको प्रचार गरिरहेका छन्,’ उनले भने, ‘आधारहिन, अराजनीतिक लाञ्छनाबाट पछि हट्न कांग्रेसलाई आग्रह गर्दछु। कांग्रेस आफ्ना अभिव्यक्तिबाट पछि हट्दैन भने एमाले यस्ता अभिव्यक्तिका विरूद्ध राजनीतिक रूपमा प्रतिवादमा उत्रन्छ।’
अध्यक्ष ओलीलाई लक्षित गरेर कांग्रेसले लगाएको आरोपबारे कांग्रेसले लिखित रूपमा क्षमायाचना गर्नुपर्ने उनले बताए।
‘अध्यक्ष ओलीलाई टार्गेट गरेर जुन प्रकारका अराजनीतिक र पूर्वाग्रही आरोप लगाइरहेको छ, कांग्रेसले यो आरोपका प्रति लिखित रुपमा क्षमायाचना गर्नुपर्दछ, सार्वजनिक रुपमा माफी माग्नुपर्छ,’ उनले भने, ‘अन्यथा कांग्रेससँग हाम्रो सम्बन्ध ठिक ढंगले अघि बढ्न सक्दैन। कांग्रेसले बुझोस्, एमाले यस प्रकारका अराजनीतिक र प्रतिशोधपूर्ण आरोपहरु सुनेर बसिरहने पक्षमा छैन।’
आइतबार प्रदर्शनी मार्गमा कांग्रेसले गरेको विरोध प्रदर्शन र खुला सभामा पनि गिरीबन्धु टी-इस्टेटको प्रसंग उठेको थियो। महामन्त्री विश्वप्रकाश शर्माले अहिलेको गठबन्धनलाई ‘सहकारीबन्धु’ गठबन्धन भनेका थिए। साथै ‘सहकारीबन्धु’ गठबन्धन भनेकोमा अध्यक्ष ओलीले केही दिन अघि बालुवाटारमा असन्तुष्टि पोखेकोसमेत शर्माले सुनाएका थिए।
सहकारी ठगी प्रकरणमा ओली संसदीय छानबिन समिति गठनका पक्षमा नरहेको शर्माको भनाइ थियो। सहकारी प्रकरणमा रविलाई साथ दिने र गिरीबन्धु प्रकरणमा रविको साथ लिनेमा ओली रहेको शर्माले बताएका थिए। एमालेले गिरीबन्धुको नाम नलिई कांग्रेसले दिएका पछिल्ला अभिव्यक्ति भन्दै अध्यक्ष ओलीमाथि कांग्रेस नेताहरूले दिएका अभिव्यक्तिलाई लक्षित गरेका थिए।
एमाले केन्द्रीय सदस्य विष्णु रिजालले अध्यक्ष ओलीमाथि कांग्रेसले आरोप लगाउनु भनेको ‘आकासतिर फर्केर थुक्नु हो’ भनेका छन्।
‘कांग्रेसले अध्यक्ष केपी ओलीमाथि आरोप लगाउनु आकासतिर फर्केर थुक्नु हो,’ सामाजिक सञ्जाल एक्समा रिजालले लेखेका छन्, ‘जलहरीको प्रोपगान्डा पानीको फोका सावित भएको यादै होला। शरणार्थी काण्डमा कांग्रेस, वाइडबडीमा कांग्रेस, इटाभट्टामा मान्छे पोल्दा कांग्रेस, टिकापुर काण्ड.. कति हो कति..। एमालेलाई बेकारमा किन जिस्काएको होला?’
एमालेले दिएका अभिव्यक्तिमाथि कांग्रेस नेताहरूले पनि जबाफ फर्काएका छन्। सभापति शेरबहादुर देउवाको निवास बूढानीलकण्ठमा सोमबार करिब तीन घन्टा चलेको पदाधिकारी र पूर्वपदाधिकारी बैठकमा पनि यसबारे नेताहरूले कुरा उठाएका थिए।
बैठकपछि महामन्त्री विश्वप्रकाश शर्माले एमाले अध्यक्ष केपी शर्मा ओलीले गलत रूपमा आरोप लगाएपछि कांग्रेसले सही प्रतिवाद गरेको प्रतिक्रिया दिए।
‘कांग्रेसले गिरीबन्धुको जग्गा बेचेर कमिसन खायो भनेर केपी शर्मा ओलीले भन्नुभएको थियो। उहाँले त्यस्तो आरोप लगाएपछि हामीले तथ्य राख्नुपर्यो। २०५२ सालमा मनमोहन अधिकारी प्रधानमन्त्री हुनुहुन्थ्यो, भूमिसुधार मन्त्री हुनुहुन्थ्यो राधाकृष्ण मैनाली। कांग्रेस त सरकारमा थिएन,’ उनले भने, ‘२०६० सालमा सूर्यबहादुर थापा प्रधानमन्त्री हुनुहुन्थ्यो, त्यो बेला पनि गिरीबन्धुबारे केही निर्णय भयो कांग्रेस सरकारमा थिएन। २०७८ सालमा केपी शर्मा ओली प्रधानमन्त्री हुनुहुन्थ्यो, गिरीबन्धुबारे बाँकी निर्णय त्यसबेला भएको थियो। कांग्रेस सरकारमै नभएका बेलाका कुरा कांग्रेसलाई आरोप लगाएपछि हामीले तथ्य राखेका हौं।’
ओलीले गलत रूपमा कांग्रेसमाथि आरोप लगाएपछि जबाफ दिइएको महामन्त्री शर्मा बताउँछन्।
‘अचम्म लाग्छ, लिखित क्षमायाचना गर्नुपर्छ भन्नुभयो रे, तर म पत्याउदै पत्याउदिनँ,’ एमाले उपाध्यक्ष विष्णु पौडेललाई लक्षित गर्दै शर्माले भने, ‘यदि उहाँले भन्नुभएको रहेछ भने संविधान सँगै बसेर लेखेका हौं। उहाँले गलत आरोप लगाउन छुट छ भने सही प्रतिवाद गर्ने छुट पनि कांग्रेसलाई छ। किनभने यो उत्तर कोरिया होइन यो नेपाल हो।’
पदाधिकारी बैठकपछि कांग्रेस सहमहामन्त्री जीवन परियारले ओलीले गिरीबन्धुको ५१ विघा जग्गा कांग्रेसले बेच्यो भन्ने अभिव्यक्ति दिएको पनि बताए।
‘उहाँले कांग्रेसमाथि ५१ विघा बेच्यो भनेर आरोप लगाउनुभएको छ। यसबारे पनि छानबिन गरौं,’ सहमहामन्त्री परियारले भने, ‘हाम्रो पार्टीका नेताले दिएका अभिव्यक्तिमा एमालेका नेताले प्रतिक्रिया दिनुभएको छ, यसमा उहाँहरू कमजोर रूपमा प्रस्तुत हुनुभएको छ।’
कांग्रेस केन्द्रीय सदस्य प्रदीप पौडेलले गिरीबन्धु टी-इस्टेटबारे सर्वोच्च अदालतको फैसलाले नै प्रष्ट रूपमा ‘ऐन नै बनाएर नीतिगत भ्रष्टाचार गरियो’ भनेको उल्लेख गरेका छन्।
‘गिरीबन्धु टी-स्टेटबारे अदालतको फैसलाबाट प्रष्ट छ- ऐन नै बनाएर नीतिगत भ्रष्टाचार गरियो। त्यसैले पनि तत्कालीन प्रधानमन्त्रीमाथि छानबिन हुनुपर्छ, अदालतको फैसला कार्यान्वयन हुनुपर्छ,’ उनले भने, ‘यसमा कसले कोमाथि आरोप लगायो, लगाएन भन्ने तर्क फगत विषयान्तर गर्ने चेष्टा मात्र हो, सचेत बनौं।’